Takornariartitsinermik inuussuutissarsiuteqarnermi aallarnisaasartunut aningaasalersuinikkut tapersiisarneq pillugu Namminersornerullutik Oqartussat nalunaarutaat nr. 9, 31. marts 2000-imeersoq.

 

Takornariartitisnermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaanni nr. 15-imi 31. oktober 1996-imeersumi § 13, imm. 2 aamma § 14-imi imm. 3 tunngavigalugit makku aalajangersarneqarput:

 

Atuuffia

§ 1. Aningaasanut inatsimmi ukiumoortumik suliniuteqarfiit tamarmiusut nalunaarut manna najoqqutaralugu kiisalu Kapitel 3 Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatasisaat tunngavigalugu tapersiissutinik qinnuteqarfigineqarsinnaasut taaneqartassapput.
Imm. 2. Nalunaarut manna malillugu ingerlatat aalisarnermut, piniarnermut nunanerilermullu tapersiissuteqartarneq pillugu Inatsisartut peqqussutaanni imaluunniit nunami inuussutissarsiutinut tapersiisarneq pillugu Inatsisartut inatsisaanni kiisalu tunisassianik ineriartortitsinermut aningaasalersuinikkut tapersiisarneq pillugu Namminersornerulutik Oqartussat nalunaarutaanni pineqartunut ilaatinneqarsinnaasut
tapersiiffigineqarsinnaanngillat.

 

Aallarnisaanermi ingerlatamut piumasaqaatit

§ 2. Tapersiissutinik qinnuteqaat qinnuteqaateqarnermi immersugassaq atorlugu uunga nassiunneqassaaq: "Takornariaqarnermi Aallarnisaasunut Tapersiisarfik" pillugu ataatsimiititaliap allattoqarfia, c/o Inuussutissarsiornermut Pisortaqarfik, Postboks 269, 3900 Nuuk. Qinnuteqaateqarnermi immersugassaq allattoqarfimmut saaffiginnilluni pissarsiariniarneqarsinnaavoq.
Imm. 2. Aningaasaqarnikkut aaqqissuussaanikkullu pilersaarusiaq, matumani tapersiissutit suut kissaatigineqarnersut ilanngullugit, qinnuteqaatip imarissavai. Aammattaaq ingerlatamut atasumik niuerfinni tuniniaanissaaq pillugu pilersaarusiaq qinnuteqaatip imarissavaa.
Imm. 3. Ingerlatat ukiut pingasut sinnerlugit ingerlanneqareersut eqqarsaatigalugit ingerlatsinermi naatsorsuutit saqqummiunneqarsimasut kingulliit kiisalu ingerlataq pillugu ukiunut tullernut marlunnut missingersuutit qinnuteqaateqartup qinnuteqaammut ilanngullugit nassiutissavai.
Imm. 4. Ingerlatat nutaat ingerlatallu ukiut pingasut inorlugit ingerlanneqareersut eqqarsaatigalugit ingerlatsinermi naatsorsuutit saqqummiunneqarsimasut kingullit, qunnuteqartup akileraartarnermut pisortanut nammineerluni nalunaarutaa kingulleq kiisalu ingerlataq pillugu ukiunut tullernut marlunnut missingersuutit qinnuteqaateqartup qinnuteqaammut ilanngullugit nassiutissavai.
Imm. 5. Missingersuutinut imm. 2-mi aamma imm- 3-mi taaneqartunut atatillugu uppernarsarneqassaaq ingerlatap ilaa aningaasalersuinikkut tapersiissutit uku atorlugit matuneqarsinnaanngitsut qinnuteqaateqartup aningaasalersorsinnaagai, qinnuteqaateqartorluunniit aningaasalersuutissanik pissarsisinnaasoq.
Imm. 6. Qinnuteqaateqarnissamut piffissaliussat tusagassiuutitigut nalunaarutigineqartassapput.

 

Qinnuteqaateqartumut piumasaqaatit

§ 3. Suliffeqarfiit ingerlatseqatigiiffittut ingerlasut suliffeqarfiillu inunnit ataasiakkaanit ingerlanneqartut qinnuteqaateqarsinnaapput.

§ 4. Aningaasalersuinikkut tapersiissuteqarfigineqarsinnaassagaanni piumasaqaatit makku naammassineqarsimassapput:
1) Oqartussat akuersissutaat pinngitsooratik pigisariaqartut atorfissaqartinneqartullu pigigini qinnuteqaateqartup qinnuteqaammini uppernarsassavaa.
2) Pigisat aningaasanik nalillit akiitsoqarfiunnginnerat qinnuteqaateqartup uppernarsassavaa.
3) Qinnuteqaateqartup suliamut pisinnaasaqarnini uppernarsarsinnaassavaa, tak. Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaat nr. 15, 31. oktober 1996-imeersoq § 12, imm. 2-mi oqaaseqatigiit siulliit. Matumani ingerlatat aallartinneqartussatut kissaatigineqartut eqqarsaatigalugit ingerlatsinikkut siulersuinikkullu pisinnaasaqassuseq ilanngullugit pineqarput.
4) Qinnuteqaateqartoq qinnuteqaateqarnermi aamma aningaasalersuinikkut tapersiissutit tunniunneqarnerisa nalaani Kalaallit Nunaanni najugaqassaaq angerlarsimaffeqassalluniluunniit, tak. Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaat nr. 15, 31. oktober 1996-imeersoq § 12, imm. 2-mi oqaaseqaatigiit aappaat.
5) Qinnuteqaateqartup saqqummiutissavaa pilersaarusiaq aallarnisaanermik ingerlatap ingerlanneqarsinnaaneranik ilimanarsisitsisoq imminullu akilersinnaaneranik takutitsisoq, tak. Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaat nr. 15, 31. oktober 1996-imeersoq § 12, imm. 3.
Imm. 2. Qinnuteqaateqartoq akilinngitsuukkanik akileraarutinut, akitsuutinut aammalu sulisitsisut inuussutissarsiutinut ilinniartitaanermut akiliutaannut akiligassaqassanngilaq, tak. Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaat nr. 15, 31. oktober 1996-imeersoq, § 12, imm. 1 -imi oqaaseqatigiit aappaat.

 

Aningaasalersuinikkut tapersiissuutit ilusaat atugassarititallu

§ 5. Tapersiissutit taarsigassarsiatut illunut aamma ingerlatsinermut atortunut annertunerusunut tunngatillugit tunniunneqartut erniaat 4%-iupput.
Imm. 2. Killilimmik akisussaaffeqarluni ingerlatseqatigiiffimmut taarsigassarsiaritinneqartut piginnittut inuttut nammineerlutik akisussaaffigaat.
Imm. 3. Taarsigassarsinermi atugassarititaasut aalajangersarneqarnerannut atatillugu qinnuteqaateqartoq qularnaveeqqusiissasoq ataatsimiititaliap piumasaqaatigisinnaavaa.

§ 6. Taarsigassarsiat suliffeqarfinnit aningaasalersuisartunit pisortanit nakkutigineqartunit taarsigassarsiarineqartut kisimik qularnaveeqqusiivigineqarsinnaapput.

§ 7. Siusinnerusukkut taarsigassarsiaritinneqartut aningaasaliiffigeqqinneqarnissaannut aningaasalersuisunikkut tapiissuteqartoqarneq ajorpoq, taamaattorli pisuni immikkut ittuni ataatsimiititaq aalajangiisinnaavoq aningaasalersuinikkut tapersiissutit taarsigassarsianut inatsit tunngavigalugit siusinnersukkut taarsigassarsiaritinneqartunut aningaasaleeqqinnertut tunniunneqarsinnaassasut. tak. Kapitel 3. Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaat.

§ 8. Aningaasalersuinikkut tapersiissutinik tunineqarnissami piumasaqaataavoq tapersiissutinik tunineqartoq ingerlatsinermi atortut tapersiissutit atorlugit pisiap imaluunniit aningaasaliiffigineqartup aserornissaannut tillinneqarnissaannulluunniit sillimmasiissasoq.
Imm. 2. Allatigut ingerlatamut attuumassuteqartunik sillimmasiisoqarnissaa ataatsimiititaliap piumasaqaatigisinnaavaa.

§ 9. Ataatsimiitaliap piumasaqaatigisinnaavaa aningaalersuinikkut tapersiissutinik tunineqartoq ukiumoortumik nalunaarusiussasoq, aningaasalersuinikkut tapersiissutit atorneqarnerat, ingerlatap akilersinnaassusia il.il. pillugit paasissutissanik imaqartumik.

§ 10. Aningaasat tapiissutit kiisalu attartortitat aatsaat tunniunneqarsinnaapput pilersinniakkamut akiligassap allagartaata, fakturap, allatulluunniit uppernarsaatip takutinneqarneratigut.

§ 11. Aningaasat tapiissutit kiisalu attartortitat isertitanut akileraaruteqaataasussanut ilanngullugit naatsorsuunneqassapput imaluunniit pigisap pisiarineqarnerata nalingata ilaatut ilanngaatigineqarsinnaallutik, aningaasarsianit akileraartutit pillugit Inatsisartut inatsisaat naapertorlugu.

 

Tapersiissutitut akuerineqareersut unitsinneqarsinnaanerat

§ 12. Tapersiissutinik tunniussisarneq ataatsimiititaliap unitsissinnaavaa:
1) naliliilluni isumaqaruni ingerlataq ingerlateqqinneqarsinnaanngitsoq,
2) naliliippat tapersiissutinik tunineqartoq paasissutissanik eqqunngitsunik imaluunniit paasinerluutaasinnaasunik tunniussisimasoq,
3) naliliippat tapersiissutinik tunineqartoq paasissutissanik tapersiissutinik tunniussinermut pingaaruteqartunik nipangiussisimasoq, imaluunniit
4) naliliippat tapersiissutinik tunineqartup piumasaqaatit ataatsimiititaliamit aalajangersarneqarsimasut imaluunniit piffissaliussat pillugit nalunaarut manna tunngavigalugu isumaqatigiissutigineqarsimasut eqqortinngikkai.
Imm. 2. Aningaasalersuinikkut tapersiissutit tunniussinermi tunngaviusut malillugit atorneqanngitsut ataatsimiititaliamut utertillugit piaartumik akileqquneqarsinnaapput, tak. Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaat nr. 15, 31. oktober 1996-imeersoq § 14, imm. 2.

 

Naammagittaalliuuteqarnissamut periarfissat

§ 13. Ataatsimiititaliap aalajangiineri inaarutaasumik aalajangiinerupput, oqartussamullu qulliunerusumut naammagittaalliuutigineqarsinnaanatik.

 

Atortuulersinneqarnera il.il.

§ 14. Nalunaarut manna 10. april 2000-imi atuutilerpoq.

 

Namminersornerullutik Oqartussat, ulloq 31. marts 2000.

 

 

Simon Olsen

/

Jørn Birk Olsen